Ministru Transpporte no Komunikasaun, José Agostinho da Silva, entrega sertifikadu ba Responsável kompañia Petrolink, José Januário dos Reis, iha salaun ANC, Caicoli, sesta (09/04). Imajen TATOLI/Natalino Costa
DILI, 09 abríl 2021 (TATOLI)–Autoridade Nasionál Komunikasaun (ANC, sigla portugés) atribui sertifikadu lisensa ba kompañia Metrolink hanesan Internet Service Provider (ISP) ka oferese liña internet ba kliente, tanba kompañia nasionál ne’e prenxe ona rekezitu tékniku no legál.
Hafoin entrega sertifiku ISP ba Metrolink, Ministru Trannspporte no Komunikasaun, José Agostinho da Silva, hateten Governu iha obrigasaun promove kompañia nasionál hodi fornese liña internet ba institusaun Governu no populasaun sira.
“Ministériu Transporte Komunikasaun (MTK) liuhosi Autoridade Nasionál Komunikasaun, fó solusaun rápida ba kestaun rede internet, nune’e bele fasilita ita-nia ajénsia no Governu, inklui populasaun tomak atu asesu rede telekomuniasaun ho di’ak no seguru,” Ministru José Agostinho informa ba jornalista iha salaun ANC, Caicoli, sesta ne’e.
Metrolink nu’udar kompañia daruak ne’ebé hetan sertifikadu lisensa ISP ho númeru 002, ne’ebé antes ne’e sertifikadu hanesan atribui ona ba Gardamor.
Governante ne’e hateten, ho atribuisaun sertifikadu, permite kompañia hahú halo ona servisu no garante servisu ho di’ak hodi responde ba ezijénsia públika durante ne’e.
“Ita-nia espetativa ba futuru, ho prezensa kompañia sira, sei normaliza situsaun komunikasaun no sidadaun sira bele asesu ba rede intenet adekuandu no kualidade,” nia akresenta.
Iha fatin hanesan, Prezidente ANC, João Olívio Freitas, hateten Metrolink hetan sertifikadu lisensa tanba kompleta rekizitu, tanba ne’e nia parte husu kompañia atu garante servisu ne’ebé di’ak ba públiku.
“ANC husu kompañia halo tuir saida maka hakerek ona iha sertifidu lisensa ne’e no buat seluk labele halo tanba iha ona lisensa maka tenke tuir legalidade ne’ebé iha,” nia fó hanoin.
Iha fatin hanesan, Responsável kompañia Metrolink, José Januário dos Reis, agradese ba Governu tanba liuhosi ANC bele atribui lisensa.
“Esforsu ida ne’e ordináriu, tanba uluk ami hein no ohin loron bele konkretiza duni,” nia tenik.
Na’in ba kompañia ne’e garante sei oferese velosidade liña internet ne’ebé di’ak ba Governu no públiku, ne’ebé rede maihosi Singapura no Kupang.
Liuhosi Dekretu-Lei Númeru 15/2012 loron 28 abríl, Governu harii ANC ho knaar atu regula telekomunikasaun, rádiu komunikasaun, radiudifuzaun, inklui Internet hosi operadór fornesedór.
Entretantu, nu’udar reguladór, ANC mos iha poder rekolla reseita hosi setór telekomunkasaun liuhosi jestaun rekursu rádiu-spektru, numerasaun (fixu, mobile, IP address, no domain name) inklui lisensa operasaun.
ANC iha mós dever atu kontribui filafali ba komunidade iha setór dezenvolvimentu liuhosi Universal
Service Obligation (USO).
Ref: http://www.tatoli.tl/2021/04/09/anc-atribui-sertifikadu-lisensa-ba-petrolink-oferese-lina-internet/