DILI, Palácio do Governo 07 Agostu 2020

CEO kompañia MetroLink, José Januário dos Reis ho nia ekipa, hala’o enkontru koordenasaun ho Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente ho ekipa hodi husu apoiu ba TIC TIMOR hodi loke espasu ba setór privadu hodi investe iha área teknolojia.

Iha enkontru ne’e, CEO Kompañia MetroLink husu mós oportunidade atu troka informasaun diretiva husi TIC TIMOR ne’ebé tuir dekretu lei fó kompeténsia priviléjiu ba área ICT nian iha Timor-Leste.

MetroLink iha produtu ne’ebé aplikavel, bele uza iha kualkér tempu hanesan digidoc no document system tanba ne’e, husu TIC TIMOR nia apoiu karik iha dekretu lei bele loke mós espasu hodi halo kooperasaun ho setór privadu.

Ho nune’e Diretór Ezekutivu TIC TIMOR I.P hatete, Ajénsia ne’e harii atu sentraliza sistema informátika Governu nian tomak hahú husi nasionál to’o munisípiu sira.

Prezensa MertoLink nian hanesan, opsaun ba públiku atu hili servisu ne’ebé maka di’ak liu hodi kompete ho operadór seluk.

Kona-ba digital document, document system no seluk tan, ida ne’e mós hola parte husi prioridade ne’ebé maka TIC TIMOR haree hela liu-liu ba tinan ida ne’e, iha mós prosesu hodi halo dezenvolvimentu aplikasaun.

Bazeia ba lei, setór privadu iha papél tanba servisu ne’ebé TIC TIMOR iha mós iha kooperasaun ho setór privadu.

Entretantu sei iha tan enkontru iha tempu badak atu fahe informasaun ne’ebé kle’an liu tan. #MÉDIA TIC#

Source: Facebook @TICTIMOR